परिश्रम केर फल मीठा होयला पंचपरगनिया कहनी: आदमी निजेक गलती गिला के अन्तर दिल लेक सोचले ठीके बुझे पारयँला। केउ तो मठजबराइ कइर को आपन गलती टा जाइन के चुपेइ रहयँला, खुइल के नि कहयँला आर केउ तो आपन गलती टाके बुझल बादे खुइल कहन कहयँला आर सुधार लानेक चेस्टा करयँला। जे मठजबराइ कइर के आपन गलती के दोहराते रहयेला, उमन केर जिन्दगीए कबउ उन्नति नि होयला आर जे लोग गिला आपन गलती सुधार आनयला, उमनेक जीबने परिवर्तन होयला एबंग उमनेक बेस दिन आयला, उमन अनुकरनीय होयँला।
सुनियाक माय – ” आइज केसन देला हो? “
डमरुक बाप – “पन्द्रो टाका किलो देली! एक खाँची रहे, सतरो कुड़ी दस टाका होलक।”
सुनियाक माय सुइन के अबाक होय गेलक आर कहे लागलक “बाबा रे बाबा, पन्द्रो टाका किलो ! हामरेक सुनियाक बाप के कहली बेलात टा लागावा न… कहलों से सुनलक नाहीं….” कोंढ़ी टाइ हेके। देखुक उमने केर केसन टाका हो तेहे। सुनियाक बाप काम करेक माहने बहुत कोढ़ी रहे। एकर-उकर घर बइसे जातक आर समय टाके बितातक। काहाँ भोज हो तेहे, काहाँ मेला लागो तेहे, सेइ गिला तो खूभे पाता लागाते रहतक।
एहे कारने उकर घरेक परिस्थिति बेजाइन जमीन रहल बावजूदो बहुत खराब रहे।उकर बहु तनिक चालाख रहे। घुरी साल सुनियाक बाप के गाइर दे दुवा कहन बाड़ी जोतुवालक आर सउब छुवा-पूता मिल के घास-पात के झाइड़-झुड़ा ढेलका के ठेंइस-ठुसा पानीए भींज-भींज बेलाती लागलयँ। से बाबू हो, ठीक दरेक समये उमनेक बेलाती बाहरालक। रोज गोरु गाड़ीए भुयाँडीह चउक बेलाती लेइज लेइज बेंचे लागलय। रोज पांच सो लेक हाजार टाका तक घरे ढुके लागलक।
सुनियाक बाप – ए सुनियाक माय! सुनिसला न? सुनियाक माय – रहा का कहो ताहा, तियन-तो-तियन पड़ोतेहे।सुनियाक बाप एतिक टाका काहाँ राखबिक मोके तो फिकिर होय जाय आहे।सुनियाक मांय – हैं इटा तोहरेक फिकिरे होय आहे। सुनियाक नाना के डाइक पाठाले एखने आबंय आर काहाँउ होलउ बेंके-तेके राखुवाय देवयँ।बेलातिक सिजने सुनियाक बाप सिगरेट केइ धुकतक। एखन तो सरइपातेक फीकाउ रुचो तेहे। नगदी पयसा सामयेक टा एखन बन्द होय आहे।
सुनियाक माँय आरो कोनो जुक्ति करेक फिकिरे आहे।एक दिन सेंदाउरी बाजार गेलक, तो देखो तेहे तामरस, पीपा बार नींबू खाँचीक ढेरी। माहाजन सउबे लेक तेहें उपरा-पारी हो तहयँ। सुनियाक माय सोचे लागलक जे फल डल लागालउ बेजाइन पयसा ।ठीक थोड़ेक दिन बादे सुनियाक माय-बाप दुलमी गेलयँ। उमनेक भेंट श्री बलदेव प्रसाद महतो संग होलक। उमन बागवानी विभागे साहेब रहयँ।
उमनेक साल्हाय सुनियाक माय-बाप घुइर के इटा-उटा फल केर गाछ लागाय लागलयँ। तो गाँवेक लोग देइख के अचम्भित होय गेलय। उमनेक काम देख के लोग हिंसागा करे लागलयँ, तो सुनियाक बाप कहे लागलय “दोसरेक कापारे सिन्दुर देइख कहन कापार ठोकले का होइ?
काम करले खायेक अभाव नेखे।”तखन गाँव आवला कहलय ए हो सुनियाक बाप ! तोहरे काहाँ ई काम-धाँन्धा गिला सिखला? हामरे कोउ सिखाय देवा।”सुनियाक बाप – “आह मोय तो एका-आर-बोका। सुनियाक मामा घरे एकटा साहेब आहे। उकर काथाय हामरे ई सउब करा तिही।गाँव आवला – एहो! हामरे कोउ भेट करुवाय देवा।सुनियाक बाप – मोंये सतीघाट होयके दुलमी जामू, पुस परबे तो सउब बड़े-ले-बड़े साहेब घर आयला आर पाता करम।समय बितलक। पूस पहँचलक।
सुनियाक बाप सतीघाट होयके ससुर घर गेलक आर बलदेव बाबू संगे दिन ठेकान ले के गाँव घुरलक। गाँवेक लोग के डाइक हुँड़ियाय के कहलक जे फानला दिन बलदेव बाबू हामरेक गाँव आबंय।कहल अनुसारे बलदेव बाबू आलय। उन्हें गाँव आवला के बुझाय लागलय -“धान खेती आर अन्य सेवी केर बादे हामरे के सब्जी बार फलदार पौधा केर खेती करना खूब जरूरी हेके। हामरे छोटानागपुर केर आदमी धान खेती करल बादे बाकी समय घरेक माहान बिताइला।
फालतु समये जदि हामरे परती आर टाँइड़ जमीने उन्नत नावां किसिम केर सब्जी आर फलदार पौधा लागाबिक, होले हामरे हरेक साल कम से कम 30 हजार लेक 40 हजार टाका नगद कामाय पारब।जेसन पपीता केर किसिम मधु बिन्दु, पुसा नन्हा, राँची भेराइटी। आम केर किसिम-आम्रपाली मल्लिका। अमरुद केर किसिम एल-यू-1 ई सउब किसिम केर पौधा बेजाइन बेसी फल देला।
आर बहुत मीठा होयला। जदि हामरे उन्नत तरीकाय फल केर खेती करब होले बछरे आराम से 30 लेक 40 हजार टाका कामाय पारब।फल मेहेन बहुत विटामिन आहे। एसइ हामरे दूध पीयेक के नि पाइला। सेइतेहें फल खायेक दरकार आहे। विदेश कर लोग जेसन अमेरिका आर रूस मेहेन फलेक राशन कार्ड बनल आहे। हुवाँ लोग लाइने ठाढ़ होय कहन फल किनो तहयँ।
तो तोहरे मोर काथा बिसास करा आर मोर बाताल अनुसारे काम करा। तोहरेक कल्यान होई। गाँवेक लोग बहुत धेयाने काथा के सुनलय आर कहल अनुसार काम करलयँ। एखन सउब लोग सुखी आहयँ। एंधो उमन हँड़िया-दारु ओ कम पीयो तहयँ। पढ़ाई-लिखाई माहनाँउ धेयान दे तहयँ। सरकार ऊ गाँव टाके आदर्श ग्राम घोषित करके योजना बना तेहे।
लेखक – बिन्देश्वर महतो