भाँटा आर बिलाती पंचपरगनिया कहनी: एक दिन भाँटा आर बिलाती माहान बहुत झागड़ा होय गेलक। एसन झागड़ा होय गेलक जे मुड़ फुटा-फुटी। बिलाती केर तो लाले लाल खून बाहराय लागलक आर भाँटा केर तो आबगा बस (चर्बी) गिला बाहराय लागलक। उमन केर मामला ऊपर तक जे सबजी केर राजा हेके आलू तक पहंची गेलक। पंचायत बइस जाय आहे। आलू कुर्सी माहान बइस जाय आहे। दोसी लोक माने भाँटा आर बिलाती के मांझे बइसाय आहयँ। धारे-धारे कंहड़ा, लउवा, मटर, मूला, फूलकबि, बाँधाकबि पालक साग, भाजी साग बइस आहयँ।
आलू राजा पूछे लागलक जे भाई दुइयो लोक तोहरे का कारने मुड़ फुटा-फुटी होला। तखन भाँटा कहे लागलक जदि मोके एकलाय रांइध के खाबयँ होले बेस लागी, पड़ाय के जदि भरिता करि होले लोकटा पीटले नी उठी एतना सवाद मोंय मानुस के देवना।सेइ टाक हिंसगाय मोके बिलाती माइर देलक। तखन बिलाती विनती कइर के कहलक नीही आलू माहाराज ओसन बात ना लागे। ऊ मोके हमेशा निंदा करते आ तेहे जे तोयँ तो एसन चेंका लागीसला जे मानुस केर दाँत कठाय जायला। तो उटा मोय केसे मानम्।
साला मोर टक बनाय देले मानुस एक थाल केर जायगाय दुइ थाल खाई आर जदि केउ पड़ाय के तेल नून आर रचिक मरची बहिन के मेसाय देलंय तो लोकटा लुल्हवा ले चाटी। सेई टा कहलों न आर मोर मुड़ टा फाटाय देलक । तखन आलू राजा विचार करे लागलक आर कँहड़ा के कहलक ऐ रे कँहड़ा तोयँ आबगा भाँटा के राँध तो आर लउवा के कहलक तोंय आबगा बिलाती के राँध तो आर सउब के चाइख देखब केकर दोस हेके आपने बुझाई।
भाँटा मने-मने खुस होय लागलक जे मोर तो जीत होबे करि। बिलातीयो खुश होय लागलक जे मोर तो केस जीतानाइ आहे। रांइध-बांइट के तो तेयार होय गेलक। सउब के पास डाकलयँ आर पहिल भाँटा तियन चाखे लागलयँ। तो केउ कहेला कादो नीयार लागेला, केउ कहेला छागीर केर पोटा नीयार लागेला केउ, कहेला जे मोर मुहँटाई खाराब होलक। सुइन के बिलाती कुलकुली दे लागलक। एँधो बिलाती तियन केर पाली पहँचलक। सउबकाइ चाखे लागलंय तो के कहेला बिसुन चेंका, के कहेला मोर दाँत ला एसन कठाय गेलक जे गुड़ खामु होलउ बेस नी होई। केउ कहेला मोर जीभटाइ छालाय गेलक। सुइन के भाँटा राम डिग बाजी दे लागलक।
तखन आलू महाराज न्याय विचार टा कइर देलक जे तोहरेक दुइयो लोगेक नी बनी। सेइ तेहें मानुस भिनु-भिनु रोपबयँ। किमबा दुइओ के जखन मानुस रांधबयँ तखन दुइयो केर बदनाम होय जाई। सेइ तेहे तहरेक संगे मोंय हर हमेसा रहमु। आलू भाँटा आर बिलाती राँधल गेलक सउब के चाखलयँ तो बहुत स्वाद केर नाम करे लागलंय। सेइ तेहें मानुस भाँटा, बिलाती गिलाके आलू संगेइ रांधयँला। खायेक माहान बाड़ा सवाद लागेला। कहल जायला “मेसा कसा बड़ी रे स्वाद जे।” सेइ तेहें मिल जुइल के रहल टाई बेस हेके।
लेखक – प्रो. भूतनाथ प्रमाणिक ‘भूपेश’