चालाक बिलाइ: एकटा नानी बुढ़िआ रहे। उ एकटा बिलाइ पइस रहे। बिलाइ टाक एकटा दीदी रहे। उ दसर गाँव माहान आपन ससुर घरे रहत रहे। अकर ससुर गाँव टा हिआँ लेक छअ कस धुरे रहे। बिलाइ टा अकर नानी बुढ़िआ पासे खूभे खात-पीअत रहे मंतुक दिनेक-दिन दुबराले जात रहे। एक दिन नानी बुढ़िआ अके पुछलक, “ए बेटी ! तएँ काहे दिन के दिन दुबराले जातिहिस ? कन टाक तर घटी आहे ?”
“नानी! तर ताहाँ मर कनअ खाएक-पीएक घटी नेखे मंतुक साराखने मके मर दीदी मने हएला आर एहे चिंता माहनेइ केजान मएँ दिनेक-दिन दुबराले जातहँ ।”
“आरे बेटी! इटाक खातिर काहे चिंता करीसला। जा, आइजे तएँ तर दीदी के देइख आव। उटाएअ जदि मन ना भरे त अकर पासेइ छ महीना तक रइह लेबे आर घुइर आबे ।”
बिलाइ नाहाए-धए, साज-सिंगार कइरकहन आपन दीदी घर जाए लागलक । अकर दीदी घर जाए खातिर एके टा साँकट डहर रहे। डहर माझे एकटा बड़े बन पावात रहे। हुँआ जनतु रहत रहएँ। से तेहें एकला जाएक माहान अके डर लागत रहे। ताउए नानी कर आसिरबाद पाए कहन उ जाए खातिर तेआर हलक।
बिलाइ तीन कस डहर नाइप चुइक रहे। एहे समइए एकटा करिआ भालू डहर कर माझे आएकहन ठाड़ हए गलेक आर कहलक, “मर बिलाइ रानी ! तएँ काहाँ चलले ?”
“भालू राजा ! मएँ आपन दीदी घर जावँला बिलाइ कहलक ।” रा डाँड़ाव ! तके हुआँ के लेगाए राखइआ आहे ? एखने तके माइर के खाए लेखूँ – भालू कहलक।”
The Sudarshan Show
पंचपरगनिया भाषा एवं साहित्य, झारखण्ड की संस्कृति, शिक्षा, प्रेरणादायक विचार, करियर मार्गदर्शन और विशिष्ट अतिथियों के साक्षात्कार से जुड़े सभी Podcast Episodes सुनें और देखें।
▶ सभी Podcast Episodes देखें“भालू राजा ! बुढ़िआ नानी ताहाँ रइहकहन मएँ कबउ बेस – बेस खाएक नि पालें। से तेहें सुखाए कहन काँटा हए जाए आहूँ। मारब’ जदि करिस त… हाड़ आर चाम छइड़कहन का पाबे? छ महीना सबुर कर। आपन दीदी घरे खूभे खाए कहन मटाए दे। घुरत के खाबे हले आबगा मासे पावे। छ महीना तक मकेइ मने करते रहबे – बिलाइ कहलक।”
भालु बिचार कइर देखलक आर अके छइड़ देलक। बिलाइ आगु बाटे चललक। एक कस चलल परेइ एकटा बाघ डहर माझे डाँड़ाए रहे। बाघ अके कहलक, “एग’ बिलाइ बहुरिआ ! एकलाइ काहाँ जातिहिस? “बिलाइ कहलक मएँ आपन दीदी घर जावँला”
“रा पेछु जाबें, पहिल तके जमपुरी पाठाए लेवं। “माहराज ! मके त खाबे करबे तबे मर एकटा नेहर सुइन ले।”
“सुनाव चाँड़े।”
“राँड़ी बुढ़िआ पासे रइहकहन कवउ बेस-बेस खाएक नि पालँ से तेहें सुइखके काँटा हए जाए आहँ। मर गाते का आहे, हाड़ आर चाम छइड़ कहन। छ महीना सबुर कर। मर दीदी घरे खुभे खाहुँ आर मटाए कहन घुरखूँ। मर मास खाए कहन मके जुग जुग मने करते रहबे।”
बाघ बिचार कइर देखलक आर अके छइड़ देलक । बिलाइ आपन दीदी घर पहँचलक। उ अके आपन छातीए लागालक आर खूभे काँदलक। उ डहर माहान घटल सउब बिरतांत अके कइह सुनालक । अकर दीदी कहलक, “आरे खेपी! तएँ एकटाउ चिंता ना कर। माँ न तके बुझ्ध सिखाए देखूँ।”
बिलाइ छ महीना तक दीदी घरे रहलक। खुभे खाए-पी कहन कहँड़ा रकम मटाए गेलक। छः महीना पुइर जाए रहे। से तेहें बुढ़िआ नानी ताहाँ घुरे खजत रहे। अकर दीदी अके बाँचाएक खातिर एकटा उपाइ करलक। एकटा लउआ कर तुंबा रहे। उटा के एक धाका देलेतीन कस डहर गुड़की जातक। अहे तुंबा टाए भीतरे अके भइर देलक आर एक धाका दे देलक । तूबा टा तीन कसे आए कहन डाँडालक।
हिआँ बाघ बिलाइ कर आसराए बइसल रहे। उ तुंबा के पुछलक, ‘ए तुंबा ! का तएँ बिलाइ बहरिआ के आवत के देइख आहिस?”
बिलाइ आपन राव बदली के कहलक, “मएँ नि देखें तर बिलाइ बहरिआ के। हए पारे आवत हइ। मके एक धाका दे। मके बेजाइं घुर जाएक आहे।” बाघ तुंबा टाके एक धाका मारलक। तुंबा गुड़कत के चललक। माझ डहरे भालू अकर आसराए बइस रहे। उ तुंबा के देइखकहन कहलक, “ए तुंबा ! का तएँ मर बिलाइ रानी के आवत के देइख आहिस ?” उ कहलक, “मएँ का जानँ तर बिलाइ रानी के। हए पारे, आवत हइ।” भालूअ एक धाका देलक तुंबा टाके ।
बिलाइ कर रेवाँउ नि झड़लक आर आपन नानी बुढ़िआ पास पहँची गेलक । नानी अके काहाँ चिन्हे पारी। मटाए कहन कँहड़ा रकम हए रहे। उ नानी के सउब कहनी कइह सुनालक । नानी हँइस-हँइस कहन कुटपाट हए गेलक। ठिके कहएँ जाहाँ गातेक बले काम नि हए ताहाँ बुझ्ध केर बले काम हएला।
| भाँटा आर बिलाती पंचपरगनिया कहनी वीडिओ |
बहुत सुंदर कहनी